Klart for nær-o-løp nr 2 torsdag 23. mai!

Markane IL står som arrangør for årets andre nær-o-løp torsdag 23. mai. Starttidspunktet er som vanleg kl.18.00.

Startstad: Sætrevegen. Følg skilting mot skisenteret.

Løpet er ein sprint og har A, B/C og N-løyper samt ei småtroll-løype.

Startkontingent: kr 40 for vaksne (over 16 år)   og kr 20 for born.

Premiering til dei minste!

NYE OG "GAMLE" O-LØPARAR VELKOMNE!

Finn-fram-dagen 2013

Victoria Bøe Fotland, Oda Svarstad Hole og Andrea Auflem Bjørke på finn-fram-dagen 2012. Foto: Margunn Hjelmeset

Resultat frå Pinseløpa i orientering

Hamar OK og Løten o-lag stod som arrangør for dei tre pinseløpa på Hamar.

Første løp var Pinsesprinten som vart arrangert på pinseafta 18. mai. Markane hadde her ein deltakar med. Markus Træen vart nummer 34 i klasse H17-20. Han fullførte den 4,9 km lange løypa på 1.09.31. Vinnar av løpet vart Nick Hann frå Verdal OK. Han vann løpet klart etter å ha kome i mål til 29 min 48 sek.

På pinsedag var det klart for løpet "Elgdilten". Klassa H17- sprang her ei løype på 6,5 km. I dette løpet var både Markus Træen og Rikard Kirkeeide Bøe med. Markus Træen vart her nummer 21 på 1.21.35 medan Rikard Kirkeeide Bøe vart nummer 24 med 1.40.04. Suveren vinnar med nesten fire minutts differanse til nummer to  vart Per Andreasson frå IFK Gøteborg med tida 44.30.

Pinseløpa vart avslutta med "Løvspretten". Klassa H17-18 skulle her orientere seg gjennom ei løype på 5,1 km. Rikard K. Bøe vart dessverre diska i dette løpet. Markus Træen kom på ein 29.plass med tida 1.15.42. Klassevinnar vart Vegard Rønning Huber frå arrangørlaget Hamar OK med tida 32.42.

Det var god deltaking også i årets pinseløp og totalt var 800-900 o-løparar i aksjon i kvart av løpa.

Resultatliste frå Pinsesprinten 18.5.2013 Klasse H17-20

Resultatliste frå Elgdilten 19.5.2013 Klasse H17-K

Resultatliste frå Løvspretten 20.5.2013 Klasse H17-18

Resultat frå krinsløp i orientering

Maren og Oddrun Hjelmeset Kirkeeide var MIL sine deltakarar på helgas krinsløp. Foto: Sigbjørn Kirkeeide (Ullsheim, 2011)

I alt 30 deltakarar stilte opp då Fjellhug/Vereide inviterte til krinsløp laurdag. Det var først og fremst dei yngste klassane som fekk opp deltakartalet. Markane hadde to deltakarar til start. Maren og Oddrun Hjelmeset Kirkeeide som deltok i klasse D10.

Vinnarar av løpet  vart Anders Felde Olaussen frå Halden IL i klasse H17 og  Irene Felde Olaussen i klasse D17.

Neste krinsløp er "Rotekoppen" i Breim 29.mai.

Resultat frå krinsløp på Sandane 11.5.2013. Arrangør: Fjellhug/Vereide

Resultat frå nær-o-løp nr 1

Vigdis Sætren frå MIL tok sigeren i den lengste A-løypa under sesongens første nær-o-løp. Foto: Heidi Bakke/NRK, 2008

O-sesongen er i gong, og i alt 54 deltakarar stilte opp i det første nær-o-løpet. Arrangør var IL Veten og løpet gjekk frå Ulvedal. Markane IL hadde med 20 deltakarar.

Vigdis Sætren var raskast i den lengste A-løypa på 4 km. Ho var i mål på tida 49,25 og slo dermed Sondre Kristiansen frå IL Veten med to sekund. I same klassa vart Per Øen nummer fem og Nils Heggdal nummer seks. Kristin Heimlid Øiestad frå Veten IL var raskast gjennom løypa på 3 km. Her kom Grete Zachariassen frå Markane IL på ein andreplass.

Nikolai og Elias Dispen Lødemel fullførte den 2,2 km lange C-løypa. Heile 11 deltakarar frå MIL fullførte den 1.5 km N-løypa og tre deltok i småtroll.

Det neste nær-o-løpet vert 23. mai. Då med Markane som arrangør.

Resultatliste nær-o-løp 1 Arrangør IL Veten Dato 9.5.2013

Innbyding til "Jølster rundt" 12.mai

Fylkeskommuna sitt 250 års jubileum vert markert med jubilumskarusellen 2013. I jubileumskarusellen inngår dei tre særidrettane ski, sykkel og friidrett.

Karusellen starta med Tverrfjelldilten 16. februar på Ullsheim og held fram denne helga med sykkelløpet "Jølster rundt" søndag 12. mai. Lokal arrangør er Førde Cykleklubb.

Løpet har start og mål ived Slåtten skule i Angedalsvegen i Førde. Løpet er ca. 90 km langt. Konkurranseklassa er open for alle frå 17 år og oppover.

Trimklassa startar mellom 9.30 og 10.30 medan konkurranseklassa startar kl.1100.

Påmelding må gjerast innan 10. mai kl 2100.

Påmeldingsskjemaet finn du på lenka her.

Du finn også meir om løpet på Førde Cykleklubb si heimeside.

Sogn og Fjordane Idrettskrins si premiering på arrangementa er deltakar-/ jubileumspremie til alle og eigen premiering samanlagt for dei som deltek i minst to av tre arrangementa i karusellen i konkurranseklassane. Jubileumskarusellen vert avslutta med løpet "Molden Opp" 15.juni.

Samarbeidspartar for jubileumsarrangementa: Sparebankstiftinga Sogn og Fjordane og fylkeskommunen.

Innbyding til krinsløp

Fjellhug/Vereide IL inviterer til krinsløp laurdag 9. mai. Løpet er eit mellomdistanseløp.

Start frå Valborgkleiva på Sandane. Det vert merka frå E39. Inga bompengeavgift.

Første start vert kl 1300.

Påmelding til Bjarne Hauge seinast torsdag 9. mai!

Påmeldinga må gjerast på e-post bjarne.hauge@enivest.net eller tlf. 97777396. Hugs å oppgje namn, klasse og  brikkenummer.

Påmeldingsavgift: Løparar t.o.m. 16år kr 65.- Etterpåmelding kr 30.-

Løparar f.o.m. 17år kr 110.- Etterpåmelding kr 60,-

Ikkje etterpåmeldingsavgift i N-klassar.

Alle velkome!

For fleire detaljar sjå innbydinga:

Innbyding krinsløp på Sandane 9.mai 2013

Sesongen startar 9. mai!

IL Veten står som arrangør for årets første nær-o-løp torsdag 9. mai. Starttidspunktet er som vanleg kl.18.00.

Startstaden vert ved Ulvedaltunet. Løpet har N-, C- og A-løyper samt småtroll-løype.

Startkontingent: kr 40 for vaksne (over 16 år)   og kr 20 for born.

Det er denne sesongen lagt opp til åtte løp.

Markane og Veten arrangerer tre løp kvar samt eit ferieløp saman. Von står som arrangør for eit løp.

Terminliste framover ser du her. Terminlista for nær-o-løpa 2013 og krinsløpa i Sogn og Fjordane er også lagt ut i venstremenyen under orienteringsgruppa.